( قبل لا أموت )
شروق الشمس يعني يومٍ آخر من جديد
شروق الشمس يعني باقيٍ للوقت روح!
**
شعاع الشمس يدفي وجنة الأرض ويزيد
عليها من جمالٍ زادها أكثر وضوح
**
وهذي الشمس ترسل نورها فوق الجليد
تحَرّك به جمادٍ باردٍ فوق السفوح
**
وانا في كل يوم آشوف شمسي من بعيد
تذكرني غلاك وفتنتك ويّا الجموح
**
تذكرني عيونك لفها رمشٍ بليد
هزيلٍ لا ارتفع نورٍ من عيونك يلوح
**
سمار الشمس لونك فالسنابل والحصيد
يغار الشيح لاشافه عليه الله شفوح
**
تذَكّرني بُعادك محرقٍ دم الوريد
غيابك عن عيوني زادني هم وجروح
**
كفايه الصد ياعمري ترى صدك مُقيد
في وسط الصدر نارٍ اشعلت صدري تفوح
**
حرام الهجر ياروحي ترى حالي جهِيد
تعالي واسمعي نبض الحشا صوته ينوح
**
أحبك يشهد الله حبك فقلبي وحيد
توحدتي بغرامٍ في فؤادي له صروح
**
وأبي منك قبل لا أموت في حبك شهيد
عيونك تقبريني وسطها وهذا طموح