مادام الشعر والاحساس فينا = بخّلي القاسي الليلة يلينا
وبتلقف على عمرو وقصيده = ابن كلثوم لو حرفه يبينا
واردد من حروفه ما طرالي = ارددّها وانا كلي يقينا
(ألا هُبّي بصحنك فاصبحينا = ولا تبقي خمور الاندرينا
مشعشة ً كأن الحُص فيها = اذا ما الماء خالطها سخينا )
ألا هبّي فديتك يا حياتي = الا هُبي فديتك ما علينا
انا والخاطر الصادق نعيشك = ترى بلحيل ما لحظة سلينا
ترى بدرك واحساسه عشانك = وباقي الخلق ماعنّه درينا
قفي يا روح بدرا بس ثواني = نفهّمك المشاعر وافهمينا
هذاك الحب والاحساس لجلك = وفيّ الروح لعيونك وفينا
انا مع قلبي الوافي بنعلن = نحبك ان أبينا او رضينا
ولو يحكون هذا الحب بلوى = هوى حبك به اليوم ابتلينا
ببالغ واكتبه احساس قلبي = احبك حيل يوم اني جنينا
كبرت وزاد عشقي واهتويتك = ومن حبك ترانا ما ارتوينا
نحبك والحياه بدون حبك = عسانا ما نعيش ولا حيينا
زرعنا حبّك ونطلب ثماره = عسى عشقك واحساسك جنينا
عسى عشقك واحساسك يطوّل = ونفرح فيه ايام وسنينا
عسى شعورك يعلمّنا غلاتي = ومن حبك لبدرك تخبرينا
وبدرك عاش ايامه وشعره = شعور وقال في لحظة انتهينا
ولكن انتي يا لبّى حياتك = تخلّين الشعر لجلك حنينا
امانه شوفي اشعاري وشعوري = فديتك يالغلا قولي بدينا
بدينا العشق من لحظة جديده = بدينا بالهوى شوف اعتلينا
سرينا الليل احساس ومحبه = خطفنا الحب بالليل وسرينا
وانا شديت حبلي في وصالك = عساه يكون في حبك متينا
وابختمها ولا ادري شسوّي = اقول الحق ياللي عارفينا
انا بدر الرحيمي وتعرفوني = كتبت اللي طرالي وارتمينا
لابن كلثوم وابياته جواهر = فخرت بما كتبت وما قرينا
انا بدر الرحيمي وافهموني = اصوغ الشعر احساس بيدينا
وافكاري جديده ما اقلـّد = وبعد ما قلت اكثرهم يجينا
يقلد وش كتبت وما كتبته = وغيره وش كثر يحمل ضغينا
لأني شاعر وفلتة زماني = يقولوا ما يقولوا وش علينا
( ألا هبّي بصحنك فاصبحينا = ولا تُبقي خمور الأندرينا )

ماشاء الله عليــك يالبــدر عين الله تحرسك

حتى عمرو بن كلثــوم وصلت له

والله مدري وش ارد واقوول حروفك من ذهب

والابداع متواصل مع بدر الرحيمــي.

الله يوفقــك وللامــــام دوومــــاْْْ